ग्रंथ ज्ञानेश्वरी रचनास्थानाला भेट

नेवासा | अविनाश जाधव – संत चोखामेळा अध्यासन केंद्र व वृंदावन फाऊंडेशन यांच्या संयुक्त विद्यमाने ‌‘चोखोबा ते तुकोबा’ या समता वारीचे प्रतीवर्षीप्रमाणे आयोजन करण्यात आले आहे. वारीचा प्रारंभ बुधवार, दि. १ जानेवारी २०२५ रोजी श्री संत चोखामेळा महाराजांची कर्मभूमी असलेल्या मंगळवेढा येथून झाला आहे . भागवत धर्म – वारकरी संतांनी सांगितलेल्या समता, मानवता आणि बंधूभाव या मूल्यांचा जागर हा समता वारी आयोजनामागील मुख्य उद्देश आहे. ‌

‘चोखोबा ते तुकोबा – एक वारी समतेची २०२५ ‘चे यंदाचे ७ वे वर्ष आहे. ही वारी महाराष्ट्रातील मंगळवेढा, पंढरपूर, अरणगाव, सोलापूर, अक्कलकोट, उमरगा, माकणी, औसा तुळजापूर, धाराशिव, तेर, कसबे तडवळे, येरमाळा, भूम-पाथरुड, खर्डा, जामखेड, सावरगाव घाट, गहिनीनाथगड, पाथर्डी, पैठण, जालना, सिंदखेडराजा, मेहुणाराजा, देउळगांवराजा, संभाजीनगर, नेवासा, शिर्डी, ताहराबाद, नगर, पिंपळेनर, राळेगणसिद्धी, शिरूर, कोरेगाव भिमा, वढू बुद्रुक, वाघोली, पुणे, आळंदी या मार्गे येऊन देहूगाव येथे जाणार आहे. वारी राज्यातील ९ जिल्ह्यातून १७५० किलोमीटर प्रवास करणार आहे.
संतांनी सांगितलेल्या समता, बंधूता व मानवता या विचारांचे दर्शन घडवणारी चित्रफीत वारी मार्गावर दाखवण्यात येणार आहे. संत चोखोबांची उत्सवमूर्ती ही विशेष सजविलेल्या गाडीत विराजमान असणार आहे.

शाळा, महाविद्यालय, वाड्या-वस्ती, गाव, शहर या ठिकाणी जाऊन वारी दरम्यान प्रबोधन करण्यात येणार आहे. माणसा माणसातील वाढत चाललेली दरी कमी होऊन समाजात बंधूभाव वाढीस लागावा, समाजातील जातीय-धार्मिक विद्वेषी दरी कमी होऊन आपापसात बंधूभाव वाढावा यासाठी तसेच समता, मानवता व बंधूभावाचा विचार अधिकाधिक लोकांपर्यत पोहचवण्यासाठी समता वारीचे दरवर्षी आयोजन करण्यात येत असते, एकसंघ समाज हे राष्ट्रीय एकात्मतेचे मुख्य अधिष्ठान आहे. जात, पंथ, धर्म, प्रांत या पलीकडे जाऊन आपण सर्वजण भारतीय एक आहोत हा विचार घेऊन सामाजिक एकतेसाठी चोखोबा ते तुकोबा एक वारी समतेची चे आयोजन यावर्षी देखील करण्यात आले आहे .

समता वारी गुरुवारी क्षेत्र नेवासा येथे ज्ञानेश्वर माऊलींनी ज्या खांबाला ठेऊन ज्ञानेश्वरी सांगितली, जिथे पसायदान मागितले त्या ठिकाणी वारी समतेची दाखल झाली होती, दरम्यान अहिल्यानगर जिल्ह्यातून प्रबोधन प्रवास करणाऱ आहे . ज्ञानेश्वर मंदिराचे वेदांतचार्य हभप देविदास महाराज म्हस्के, शिवाजी होन यांनी स्वागत केले, समता वारीचे निमंत्रक सचिन पाटील, महादेव ढेंबरे, शरदराव गायकवाड, मल्हारराव पिंपळे, अजय शिंदे, ऍड रोहित मुंडे, आदी समता वारी सदस्य प्रतिनिधी उपस्थित होते.

आपली जाहिरात इथे करण्यासाठी खालील क्रमांकावर संपर्क करावा :
७५०७६७६०७५.

आम्ही नेवासकर न्युज अपडेट साठी सोबत दिलेल्या लिंक वर क्लिक करा आणि नेवासा तालुक्यातील सर्व न्यूज अपडेट जाणून घ्या.

कृपया एका व्यक्तीने एकच ग्रुप जॉईन करावा, कारण सर्व ग्रुप वर सारख्याच न्युज अपडेट होणार आहे.