घोडेगाव तालुका झाला, बसस्थानकाचा पत्ता नाही; प्रवाशांची गैरसोय वाढली.

कोट्यवधींची उलाढाल करणाऱ्या बाजारपेठेला अद्याप एसटी महामंडळाच्या सुसज्ज बसस्थानकाची प्रतीक्षा

घोडेगाव : नुकतीच तालुक्याची निर्मिती झालेल्या घोडेगाव येथे अद्यापही मूलभूत वाहतूक सुविधांचा अभाव जाणवत असून, महाराष्ट्र राज्य परिवहन महामंडळाचे (एसटी) स्वतंत्र बसस्थानक नसल्याने प्रवाशांना मोठ्या गैरसोयीला सामोरे जावे लागत आहे. तालुक्याचा दर्जा मिळाल्यानंतरही बसस्थानकाचा प्रश्न प्रलंबित असल्याने नागरिक व प्रवाशांमध्ये नाराजी व्यक्त होत आहे.छत्रपतीसंभाजीनगर-अहिल्यानगर महामार्गावरील घोडेगाव हे महत्त्वाचे व्यापारी केंद्र म्हणून ओळखले जाते. येथे दर आठवड्याला भरत असलेल्या जनावरांच्या बाजारातून कोट्यवधी रुपयांची उलाढाल होते. तसेच कांदा बाजारपेठेमुळेही परिसरातील शेतकरी आणि व्यापाऱ्यांची मोठी आर्थिक उलाढाल घडत असते. त्यामुळे जिल्ह्यासह मराठवाडा आणि नगर परिसरातील अनेक नागरिकांचे या ठिकाणी सतत येणे-जाणे असते.

घोडेगाव तालुक्याची निर्मिती झाल्यानंतर विविध शासकीय कार्यालये येथे सुरू झाली असली, तरी एसटी महामंडळाचे अधिकृत बसस्थानक अद्याप अस्तित्वात आलेले नाही. मराठवाड्याकडून येणाऱ्या आणि जाणाऱ्या अनेक बस घोडेगाव मार्गे प्रवास करतात; मात्र अधिकृत बसथांबा नसल्यामुळे प्रवाशांना महामार्गाच्या कडेला उभे राहून बसची वाट पाहावी लागते.
सध्या गावात एक साधा बसथांबा असला तरी तेथे बहुतांश बसेस थांबत नसल्याची तक्रार प्रवासी करत आहेत. परिणामी प्रवाशांना जीव धोक्यात घालून रस्त्याच्या कडेला उभे राहावे लागते. विशेषतः महिला, ज्येष्ठ नागरिक, विद्यार्थी आणि ग्रामीण भागातील प्रवाशांना याचा मोठा फटका बसत आहे. अनेक वेळा बस थांबेल की नाही याचीही शाश्वती नसल्याने नागरिकांमध्ये असंतोष वाढत आहे.

घोडेगाव हे तालुक्याचे मुख्यालय बनल्यानंतर येथे दररोज शेकडो नागरिक विविध कामांसाठी येत असतात. मात्र त्यांच्यासाठी प्रतीक्षागृह, स्वच्छतागृह, पिण्याचे पाणी किंवा बसस्थानकासारख्या मूलभूत सुविधा उपलब्ध नाहीत. त्यामुळे तालुक्याच्या ठिकाणी सुसज्ज एसटी बसस्थानक उभारण्याची मागणी आता अधिक जोर धरू लागली आहे.
स्थानिक नागरिक, व्यापारी, शेतकरी आणि प्रवासी यांनी राज्य परिवहन महामंडळ व शासनाने या प्रश्नाची तातडीने दखल घेऊन घोडेगाव येथे आधुनिक व सर्व सुविधांनी युक्त बसस्थानक उभारावे, अशी मागणी केली आहे. तालुक्याचा दर्जा प्राप्त झाल्यानंतरही वाहतूक सुविधांकडे दुर्लक्ष होत असल्याची भावना नागरिकांमध्ये व्यक्त होत आहे.

“घोडेगाव हे तालुक्याचे मुख्यालय असूनही बसस्थानक नसणे ही दुर्दैवी बाब आहे. प्रवाशांच्या सुरक्षिततेसाठी आणि सोयीसाठी तातडीने सुसज्ज एसटी बसस्थानक उभारण्यात यावे,” अशी मागणी परिसरातील नागरिकांनी केली आहे.”

आपली जाहिरात इथे करण्यासाठी खालील क्रमांकावर संपर्क करावा :
७५०७६७६०७५.

आम्ही नेवासकर न्युज अपडेट साठी सोबत दिलेल्या लिंक वर क्लिक करा आणि नेवासा तालुक्यातील सर्व न्यूज अपडेट जाणून घ्या.

कृपया एका व्यक्तीने एकच ग्रुप जॉईन करावा, कारण सर्व ग्रुप वर सारख्याच न्युज अपडेट होणार आहे.