घोडेगाव – आगामी ग्रामपंचायत निवडणुकांच्या पार्श्वभूमीवर गणेशवाडी ग्रामपंचायतीच्या प्रभागनिहाय आरक्षणाचा प्रारूप आराखडा जाहीर करण्यात आला असून, त्यामुळे गावातील राजकीय हालचालींना वेग आला आहे. जिल्हाधिकारी कार्यालयाने प्रसिद्ध केलेल्या आराखड्यानुसार ग्रामपंचायतीत एकूण ९ सदस्यसंख्या असून त्यासाठी तीन प्रभाग निश्चित करण्यात आले आहेत. प्रत्येक प्रभागातून तीन सदस्य निवडून दिले जाणार आहेत.
जाहीर करण्यात आलेल्या आरक्षणानुसार प्रभाग क्रमांक १ मध्ये एक जागा अनुसूचित जाती, एक जागा सर्वसाधारण महिला (स्त्री राखीव) आणि एक जागा सर्वसाधारण प्रवर्गासाठी राखीव ठेवण्यात आली आहे. त्यामुळे या प्रभागात नव्या उमेदवारांना संधी मिळण्याची शक्यता निर्माण झाली आहे.
प्रभाग क्रमांक २ मध्ये एक जागा सर्वसाधारण, एक जागा नागरिकांचा मागास प्रवर्ग (ना.मा.प्र.) महिला, तर एक जागा सर्वसाधारण महिला यासाठी राखीव ठेवण्यात आली आहे. महिला आरक्षणामुळे अनेक इच्छुकांनी निवडणूक तयारीला सुरुवात केली आहे.
प्रभाग क्रमांक ३ मध्ये एक जागा नागरिकांचा मागास प्रवर्ग (ना.मा.प्र.), एक जागा सर्वसाधारण, तर एक जागा सर्वसाधारण महिला यासाठी राखीव ठेवण्यात आली आहे. या आरक्षणामुळे काही विद्यमान इच्छुकांच्या राजकीय गणितात बदल होण्याची शक्यता वर्तवली जात आहे.प्रभागांच्या सीमा निश्चित करताना गावातील प्रमुख रस्ते, शिवार हद्दी तसेच कोतुकी नदीचा विचार करण्यात आला आहे. प्रारूप आराखडा जाहीर झाल्यानंतर गावात आरक्षणावर चर्चा रंगू लागली असून संभाव्य उमेदवारांनी मतदारांशी संपर्क वाढविण्यास सुरुवात केली आहे.
दरम्यान, आरक्षणाबाबत हरकती व सूचना दाखल करण्यासाठी प्रशासनाने निश्चित मुदत दिली असून त्यानंतर अंतिम आराखडा प्रसिद्ध केला जाणार आहे. अंतिम आरक्षण जाहीर झाल्यानंतर ग्रामपंचायत निवडणुकीचे चित्र अधिक स्पष्ट होणार असल्याचे ग्रामस्थांमध्ये बोलले जात आहे.
आपली जाहिरात इथे करण्यासाठी खालील क्रमांकावर संपर्क करावा :
७५०७६७६०७५.
आम्ही नेवासकर न्युज अपडेट साठी सोबत दिलेल्या लिंक वर क्लिक करा आणि नेवासा तालुक्यातील सर्व न्यूज अपडेट जाणून घ्या.
कृपया एका व्यक्तीने एकच ग्रुप जॉईन करावा, कारण सर्व ग्रुप वर सारख्याच न्युज अपडेट होणार आहे.
